Не се согласуваме со некои правни елементи и веруваме дека висината на казната не е пропорционална со напорите што ги направивме, велат од „Гугл“ за одлуката за сродните права.

„Гугл“ поднесе жалба на казната од 500 милиони евра што и беше изречена во јули од страна на Француската агенција за конкуренција, во случај на почитување на сродните права, што е прва таква одлука на европскиот регулатор, објави во средата „Гугл“.

„Не се согласуваме со некои правни елементи и веруваме дека висината на казната е непропорционална со напорите што ги направивме„ за почитување на сродните права, кои обезбедуваат надомест за медиумите за преземање на нивната содржина на пребарувачите, рече извршниот директор на француската филијала на Гугл Себастијан Мисоф.

„Ги признаваме сродните права и остануваме посветени на потпишување договори во Франција“ со уредниците на печатените медиуми, додаде тој.

Францускиот антимонополски регулатор го казни Гугл со 500 милиони евра за непочитување на неколку судски наредби издадени во април минатата година.

Казната е изречена затоа што „корпорацијата не спроведе соодветни преговори со издавачите за примена на сродни права и надомест за употреба на содржина“, пренесе АФП.

„Кога регулаторот издава наредби, компаниите треба внимателно да ги извршуваат. Во овој случај, тоа не се случи “, рече Изабел де Силва, претседател на француската агенција за конкуренција.

Во април 2019 година, Европската унија усвои директива со која се зајакнува имплементацијата на законот за авторски права кога се објавува на интернет.

Оваа директива ја зајакнува, меѓу другото, позицијата на издавачите, дозволувајќи им да наплатуваат за користење на нивната содржина на онлајн платформи. Во исто време, овозможува бесплатно објавување линкови до статии и други медиумски материјали.

На крајот на јули 2019 година, врз основа на оваа директива, во Франција беше донесен закон за сродни права во интерес на новинските агенции и уредниците на медиумите. Според законот, радиодифузерите за вести, социјалните мрежи и другите онлајн платформи мора да платат надомест на медиумите за објавување на нивните материјали според посебен договор.

Агенцијата за конкуренција, исто така, му нареди на Google да „понуди надомест за користење на нивната заштитена содржина“ на уредниците и новинските агенции, под закана од казна до 900.000 евра дневно.

Гугл во средата соопшти дека презела чекори за да одговори на тие барања.

„Ја проширивме нашата понуда за повеќе од 1.200 уредници на весници, изменивме некои аспекти од нашите договори и ги споделивме информациите што се бараат од нас за да се усогласиме со одлуката на Агенцијата за конкуренција“, рече Мисофе.