Со цел да го спречи увоз во ЕУ на бело сирење од брендот „фета“ од Канада, Грција е подготвена да ги искористи сите законски можности, дури и да стави вето, изјави во Солун главниот секретар на грчкото Министерство за земјоделски развој и храна, Димитрис Мелас.

Според објавите на весникот „Нафтемборики“, најавата на Мелас доаѓа во пресрет на преговорите за слободна трговска размена меѓу ЕУ и Канада.

Мелас нагласи дека Грција во писмена форма го известила канадскиот претставник за своите намери, како и дека планира прашањето со „канадската фета“ да го постави на планираната  средба на ЕУ во ноември.

Европската комисја, а потоа и Европскиот суд, решија дека сирењето „фета“ е грчки бренд и дека тоа може да се нарекува така само доколку е произведено во одредени региони во Грција.