Грчките власти најавуваат зајакнување на информатичките системи и привремени технички решенија за побрз проток на патници и возила.

Грчките власти најавија нови мерки за олеснување на сообраќајот на граничните премини „Евзони“ кон Македонија и „Кипи“ кон Турција, по зголемените задржувања што се поврзуваат со примената на европскиот систем за влез и излез, познат како EES.

Одлуките биле разгледани на состанок во Солун, свикан од заменик-министерот за внатрешни работи на Грција, надлежен за Македонија и Тракија, Константинос Гулекас. На состанокот учествувале претставници на полицијата, царината, локалните власти и други надлежни служби.

Според официјалното соопштение, мерките се насочени кон дополнително зајакнување на информатичките системи, со цел побрза обработка на контролите. Се разгледува и можност за привремени технички решенија во инфраструктурата, кои би помогнале за полесен проток на патници и возила.

Гулекас посочил дека туристичкиот и трговскиот сообраќај кон Грција постојано расте, а новите биометриски проверки создаваат дополнително оптоварување при полициските контроли. EES од 10 април 2026 година е целосно оперативен во Шенген-зоната и ги заменува печатите во пасошите со дигитална евиденција за влез и излез на патници од земји надвор од ЕУ.

Специјални тимови требало да излезат на терен на „Евзони“ и „Кипи“ за да ја разгледаат непосредната примена на мерките. Според грчкото соопштение, тимови со претставници од администрацијата, полицијата, царината, регионалните власти и општините биле најавени за посета на двата премина.

Од македонска страна, АМСМ во дневните информации наведува дека на граничните премини нема подолги задржувања за влез и излез од државата. Сепак, патниците кои одат кон Грција треба да предвидат дополнително време, бидејќи задржувањата може да се појават на грчката страна од преминот, особено кај автобуси и организирани групи.

Проблемот со „Евзони“ станува особено чувствителен пред почетокот на летната сезона, кога голем број македонски граѓани патуваат кон грчките туристички места. Главното прашање е дали најавените технички мерки ќе го забрзаат протокот пред најфреквентните викенди и туристички смени.