Повеќе од еден милион српски туристи кои секое лето одмараат во Грција најверојатно нема да се соочат со долги гужви на границите поради новиот европски систем за влез и излез (EES).

Директорот на Националното здружение на туристички агенции на Србија (JUTA), Александар Сеничиќ, изјави дека постои голема веројатност Грција да го ублажи или привремено да го суспендира системот во текот на летната сезона.

• - Се надевам дека во текот на сезоната EES нема да се применува за нашите туристи. Очекувам Грците да ја следат препораката на Европската комисија и во јули и август да вршат само класична пасошка контрола – истакна Сеничиќ.

Грција веќе донесе одлука британските туристи да бидат ослободени од биометриски проверки, со цел да се избегнат големи гужви на аеродромите и граничните премини, имајќи предвид дека тие се меѓу најбројните посетители.

Сличен пристап, според Сеничиќ, може да се примени и за туристите кои доаѓаат по копнен пат, особено во периоди на зголемен сообраќај.

Тој додава дека и во јуни, за време на ударните термини, можно е привремено укинување на биометриските проверки, со цел побрз проток на патници.

• - Туристите не треба да се откажуваат од патувањето. Грција останува безбедна и атрактивна дестинација, а сигурен сум дека ќе се најде начин да се олесни влезот за сите – порача Сеничиќ.

Според најавите, во преодниот период до септември 2026 година, земјите членки имаат можност флексибилно да ја применуваат EES регулативата, што значи дека при големи гужви граничните служби можат да ги прескокнат биометриските процедури и да се вратат на класична контрола со печатирање на пасошите.