Генералниот секретаријат за цивилна заштита на Грција им се заблагодари на сите земји кои помогнаа во справувањето со последиците од фаталниот пожар околу Атина. Како што јави дописничката на МИА од Атина, Грција побара помош преку Европскиот механизам за цивилна заштита, но имаше и такви кои излегоа во пресрет на билатерално ниво, како што е случајот со Македонија.

- На грчкото барање преку Европскиот механизам за цивилна заштита, одговорија Бугарија, Шпанија, Италија, Хрватска, Кипар, Малта, Црна гора, Португалија и Романија. Исто така, помош на билатерално ниво понудија Албанија, Австрија, Франција,Грузија, Швајцарија, Израел, Унгарија, ПЈРМ, Србија, Турција и Чешка, соопштуваат од секретаријатот.

Грција ја прифатила помошта само од Кипар, Италија, Романија и Хрватска, бидејќи почнале да се подобруваат временските услови и не било потребно дополнително зајакнување на противпожарната служба. Во случајот со Хрватска и покрај прифатената понуда, не пристигнала помош бидејќи имало пожари и во самата земја.

На грчките пожарникари им помагале Италија и Шпанија со по два канадери (Цанадаир ЦЛ-415В), Романија со противпожарен авион ЦЈ27, а Кипар со пожарникари и две возила.

- Генералниот секретаријат за цивилна заштита изразува искрена благодарност до сите земји кои побрзаа да понудат помош, како и до Европската унија за брзиот одговор и помош, пишува во соопштението, пренесе МИА.