Во Грција од денеска до среда повторно нема да има железнички сообраќај, поради штрајк на железничарите кои протестираат против одлуката „Траиносе“ да биде продадена на италијанската државна железница, јави МИА. Грчкиот Фонд за развој минатата недела информираше дека италијанската железница „Феровие Дело Стато Италиане“ С.п.А во целост ќе ја преземе грчката железница „Траиносе“ за 45 милиони евра. Од Фондот за развој соопштија и дека завршувањето на тендерот претставува заокружување на процес кој започна пред три години и обезбедува одржливост и понатамошен развој на „Траиносе“. „Феровие“ е трета по големина железничка компанија во Европа и се очекува да пренесе умешност, практично знаење и искуство за „Траиносе“, наведе Фондот. Италијанските власти дополнително се изјасниле дека имаат повеќе планови за Грција за развој на железничката инфраструктура.