Кризата во Грција ги затвора продавниците во градот Сандански, во југозападниот дел на Бугарија, каде што Грците беа чести и добри клиенти, јавува атинското радио Скај. Градот со 27.000 жители на 20 километри од границата , пред неколку години економски "цветаше" првенствено затоа што жителите на Солун и други градови во северна Грција, масивно за викенд доаѓаа на шопинг , оставајќи значителен износ на бугарскиот пазар на прехранбени производи, облека, апарати за домаќинство... Радио Скај, со народната поговорка "Кога на соседот не му е добро, ни тебе не може да ти биде ", ја објаснува констатацијата на бугарскиот весник Стандард која вели дека за неколку дена од почетокот на 2014 година, затвориле десетина продавници во Сандански , поради банкрот на сопствениците, и на крајот на 2013 пропаднале веќе дваесетина. "Од 20 јануари (кога ќе бидат доставени финансиските извештаи за 2013 година) следува бран на банкротства , а туристичкиот пазар е мртов. Состојбата од година во година е се полоша. Бројот на посетители од Грција, драстично е намален, а оние кои се уште доаѓаат, купуваат многу помалку од порано ", вели еден локален трговец за Стандард, Стојан Кандишки. Сандански во времето на војните во Југославија во 90-тите години беше на работ на високопрофитабилни зони во Бугарија за претовар, препакување и " дотерување на документација" на разни стоки чиј што промет во тоа време беше ограничен поради војната и санкциите.   А.А.