Граѓаните да внимаваат, расте бројот на интернет измами
Секторот за компјутерски криминал и дигитална форензика регистрирал зголемен број на пријави и информации за сомненија за сторени кривични дела од областа на интернет измамите.
Во ваквите случаи најчесто жртви се македонски граѓани и фирми од Македонија. Измамите се прават така што е-меил адресата со која комуницира македонскиот правен субјект со своите соработници од земјава и странство, а преку која се договараат деловни зделки и уплати на парични средства е злоупотребена односно е-меил адресата и лозинката се украдени при што содржината на истата е под контрола на измамниците. Односно, откако измамниците пристапиле до е-меил адресата, истите тајно ја надгледуваат е-меил коресподенција и на тој начин имаат увид во деловни соработки и договори. Ова следење на е-меил комуникација се врши до моментот кога ќе се оствари договор со бизнис соработникот за уплата по основ на фактура/профактура за конкретна услуга. Во тој момент од страна на измамниците кои имаат целосен пристап на е-меил адреса се врши измена односно се фалсификуваат банкарските податоци на испратената фактура со цел истата од страна на жртвата да се уплати во друга банка на лажна сметка. Овие лажни сметки се отворени во различни држави на светот и се користат од измамниците за правење на ваков вид злоупотреби.
Пријавите или информациите за постоење на сомненија за овој вид измами, да се пријават до Секторот за компјутерски криминал и дигитална форензика при МВР.
Најдобриот метод за борба против овој вид на криминал е превенцијата и високото ниво на свест при користење на интернет мрежата во деловната комуникација. Од Одделението за истраги на компјутерски криминал при Секторот за компјутерски криминал и дигитална форензика советуваат е-меил адресите кои правните субјекти ги употребуваат за деловна соработка да се користат максимално професионално и од страна на ограничен број вработени во фирмата. Корисничките лозинки на е-меил адресите да содржат комплексни карактери и истите да се менуваат на одреден временски период. Ако е возможно, за деловни потреби да се избегнува користење на комерцијални е-меил сервиси, а истите да се заменат со професионални ИТ фирми кои нудат вакви услуги и гаранции за квалитет на истите. Да се прави телефонска или друг вид на потврда со деловниот соработник за договорените фактури/профактури, особено ако се воочи измена во банкарските податоци каде треба да се уплатат паричните средства. Сомненијата за измами во истиот момент да се пријават до одговорните во Банката каде правниот субјект е клиент како би можело навремено да се превенира во извршувањето (процесирањето) на трансакцијата.
Слично
Поврзани вести
