Кулминираат несогласувањата во Демократската партија на Албанците (ДПА). По наредба на лидерот Мендух Тачи, партијата денеска ги исклучи градоначалникот на Струга Зијадин Села и претседателот на струшкиот огранок Лавредим Елмази. Одлуката беше донесена експресно, откако целиот струшки огранок на ДПА, заедно со Села, синоќа ги замрзнаа партиските активности и одлучија да не учествуваат во предизборната кампања. Вака било одлучено заради несогласувањата меѓу Села и Тачи за тоа кој да биде носител на кандидатската листа во петтата изборна единица, каде што припаѓа Струга. Села тврди дека предложениот кандидат Зија Јонузи ја нема поддршката во Струга и побара листата со овој носител да се повлече, додека Тачи инсистира дека сите предложени кандидати ја поминале редовната внатрепартиска постапка за кандидирање. И покрај ваквите несогласувања околу парламентарните избори, струшкиот градоначалник сепак вели дека ќе го поддржи претседателскиот кандидат на ДПА Илијаз Халими и нема да се залага за бојкот на изборите.