Од ноќеска на полноќ граѓаните ќе плаќаат поевтини горива, откако Регулаторната комисија за енергетика (РКЕ) донесе одлука за намалување на цените во просек за 2,13 проценти.

Бензините и дизелот поевтинуваат за 1,50 денар по литар, додека единствено екстра лесното масло за домаќинство поскапува за 0,50 денари.

Според новата одлука, од 21 април во 00:01 часот ќе важат следните максимални цени:

• ЕУРОСУПЕР БС-95 – 80,50 денари
• ЕУРОСУПЕР БС-98 – 82,50 денари
• ЕУРОДИЗЕЛ – 94,00 денари
• Екстра лесно масло – 97,00 денари

Цената на мазутот, пак, се намалува за речиси 3 денари по килограм и ќе изнесува 46,288 денари.

Намалувањето доаѓа по падот на цените на нафтените деривати на светските пазари, особено кај дизелот, кој бележи значителен пад од над 9 проценти.

Во пресметката, како што посочуваат од РКЕ, се вклучени и повластениот ДДВ од 10 проценти и намалените акцизи.

Иако станува збор за максимални цени, трговците можат да продаваат и по пониски цени, што остава простор за дополнителни намалувања на пазарот.