Францускиот производител на автомобили „Рено“ во понеделник соопшти дека планира да ги намали работните места во инженерството во Франција до крајот на 2027 година, како дел од напорите за зголемување на конкурентноста во однос на кинеските производители на автомобили, објави „Ројтерс“.

„Рено“ соопшти дека намалувањето на работните места ќе биде спроведено преку програма за доброволно отпуштање насочена кон некои од приближно 5.500 работни места во инженерството во земјата.

Француската компанија изјави дека планот е дел од стратегијата за прилагодување кон растечката конкуренција од кинеските производители на автомобили, кои во последните години добиваат пазарен удел во Европа благодарение на пониските трошоци и пократките времиња за развој на нови модели.

Во април, „Рено“ соопшти дека планира да го намали својот глобален инженерски кадар за 15 до 20 проценти во следните две години, што би можело да вклучува до 2.400 работни места.

Компанијата во тоа време изјави дека сака да стане поагилна и поефикасна во услови на зголемена конкуренција на глобалниот пазар на автомобили.

Францускиот производител, како и другите традиционални европски компании за автомобили, се соочува со зголемен притисок од кинеските конкуренти , особено во сегментот на електрични возила, каде што кинеските компании бележат брз технолошки развој и конкурентни цени.

Како што наведуваат во „Рено“, планираното намалување на бројот на вработени е дел од посеопфатна деловна трансформација насочена кон забрзување на развојот на нови модели и зголемување на профитабилноста на компанијата во наредните години.