Веста за укинувањето на 50.000 работни места во „Фолксваген“ ја потресува јавноста, но новите податоци укажуваат на уште еден исто така опасен тренд. Имено, медиумите во Германија пишуваат дека има нагло намалување на огласите за нови работни места во германската автомобилска индустрија.

Како што објави „Виершафтсвохе“, податоците покажуваат дека пазарот на трудот во германската автомобилска индустрија полека се празни, а последиците ги чувствуваат и квалификуваните инженери и менаџери.

Во Волфсбург, седиштето на „Фолксваген“, атмосферата меѓу вработените е напната.

Извршниот директор Оливер Блуме најави укинување на 50.000 работни места до 2030 година, од кои 35.000 директно во „Фолксваген“, додека останатите ќе влијаат на „Ауди“, „Порше“ и софтверската дивизија „Каријад“.

„Сите прашуваат: Кој е следен?“, им рече неименуван вработен во „Фолксваген“ на новинарите минатата недела.

Дополнително, германската автомобилска индустрија понуди 136.000 слободни работни места пред три години, додека тој број падна на само 86.000 минатата година.

Бројот на слободни работни места за инженери се намали од 48.000 на 30.000 за две години, а во истражувањето и развојот од 16.700 на критични 6.800 отворени работни места, додека побарувачката за менаџери се намали за 20 проценти.

Според истражувањето на Здружението на автомобилската индустрија (VDA), речиси секоја втора компанија во секторот моментално ја намалува својата работна сила во Германија.

Загрижувачки е што една од четири фабрики ги намалува работните места исклучиво во својата матична земја, а во исто време отвора нови работни места во странство, каде што трошоците за работење се пониски.

Поранешните бастиони на стабилност сега се жаришта на криза, а добар пример е Минхен, седиштето на BMW, каде што бројот на слободни работни места се намали од 9.000 на 6.300 за само една година.

Слична судбина го снајде и Инголштат, седиштето на Audi, каде што понудата за работа е намалена за една третина.

Ауди планира да отпушти 7.500 од своите 55.000 работни места до 2029 година.

Експертите предупредуваат дека производителите на делови и опрема се во уште потешка позиција од самите автомобилски гиганти.

Додека Фолксваген и Ауди се потпираат на големи капитални резерви, на помалите добавувачи им се заканува банкрот поради високите маржи.

Единствените сектори кои бележат мало закрепнување на побарувачката за персонал се правните и даночните оддели, што индиректно потврдува дека индустријата е повеќе загрижена за регулативата и реструктуирањето отколку за иновациите.