Германија нема авиони за гаснење пожар, изјави портпаролот на Федералното министерство за внатрешни работи, објаснувајќи зошто Берлин се уште не понудил помош за јужноевропските земји кои се соочуваат со пожари, објави АНА-МПА.

„Германија се уште не испратила помош за земјите погодени од шумските пожари, но во моментов се испитува дали федералната влада може да испрати пожарникари во Грција“, рече портпаролот на министерството. 

Според него, од почетокот на пожарите Грција, Албанија, Италија, Северна Македонија и Турција побарале поддршка од Европската унија. Покрај тоа, од федералната влада е побарана директна помош. Повеќето барања се однесуваат на противпожарни авиони, кои Германија ги нема, рече портпаролот, кој сепак истакна дека грчкото барање се разгледува преку заеднички центар за вакви проблеми.

Според германската новинска агенција (ДПА), полицајците и хеликоптерите на Вооружените сили може да се користат за справување со воздушни пожари во Германија, иако полициските хеликоптери во некои случаи можат да носат само релативно мала количина вода.

Неодамна, Парламентарната група на Зелените повика на купување противпожарни авиони и хеликоптери во Германија со оглед на последиците од климатските промени.