Германската влада денеска објави дека ќе ја национализира „Унипер“, најголемата енергетска компанија во земјата, со цел да обезбеди снабдување со енергија на домовите и деловните субјекти на граѓаните.

Германија ќе потроши 8 милијарди евра за купување на акциите на „Унипер“, со што ќе добие 99 отсто сопственички удел. Фортум, финската енергетска компанија, ќе го продаде својот мнозински удел на германската влада за 1,70 евра по акција, што е само мал дел од вредноста на акциите на Унипер пред Русија да ја нападне Украина во февруари, кога тие се тргуваа по цена од околу 40 евра по акција.

Во јули, германската влада презеде 30 отсто од акциите во Унипер и се согласи на пакетот за спас во вредност од 15 милијарди евра за да се избегне катастрофа. Компанијата е одговорна за снабдување со околу 40 отсто од гасот што се користи во Германија, вклучително и стотици општини кои обезбедуваат греење на домовите низ целата земја. Финската влада има удел во Фортум, а Хелсинки одби да обезбеди дополнителна помош за германската компанија.

„Овој чекор стана неопходен бидејќи ситуацијата јасно се промени во последните недели. Условите се влошија особено откако Русија ги прекина сите испораки на гас преку гасоводот Северен тек на почетокот на септември. Денешниот договор дава јасност за сопственичката структура, ни овозможува да продолжиме со нашиот бизнис и да ја исполниме нашата улога како системски клучен снабдувач со енергија“, рече германскиот министер за енергетика Роберт Хабек.

Одлуката на Берлин да го национализира Унипер е најновиот пример на владите ширум Европа кои со децении промовираат пристап на слободен пазар во индустријата за електрична енергија и природен гас, додека законодавците се обидуваат да обезбедат снабдување и покрај рекордните високи цени на енергијата.

ФОТО: EPA/FRIEDEMANN VOGEL