Германија размислува да го прекине планираното затворање на електрани на јаглен, како дел од пакетот мерки за намалување на зависноста од руската енергија и ублажување на товарот од високите цени на енергијата, се вели во нацрт-документот во кој увид имаше Ројтерс.

Иако владата останува посветена на планот за постепено укинување на јагленот до 2030 година, во нацрт-законот се наведува дека одложувањето на затворањето на електраните на јаглен ќе биде во функција на намалување на потрошувачката на гас во производството на електрична енергија.

- Како дел од тоа, исклучувањето на електраните на јаглен може да биде суспендирано на неодредено време во согласност со мислењето на Федералната агенција за мрежа - се наведува во нацртот.

Според документот, мерките ќе вклучуваат и доделување заеми со ниски камати на компании кои имаат проблеми со ликвидноста поради високите цени на енергијата.