Генералниот секретар на Исламската верска заедница Африм Тахири си поднесе оставка на функцијата  непосредно пред почетокот на Рамазанските пости. Од ИВЗ велат дека се изненадени од потегот и немаат никакви информации за причините за овој потег. Уште повеќе што Тахири своето повлекување го најавил единствено на Фејсбук, а од тогаш им е недостапен за телефонски јавувања. „Во неможност да и понатаму се занимавам и обвинувам за туѓите грешки, давам оставка од позицијата Генерален Секретар на ИВЗ. Како поранешен ученик на медресето „Иса Бег“, им го честитам на сите светиот месец Рамазан и ги повикувам сите теолози да го дадат својот максимум за што подобро образование на новите генерации“, напиша тој на Фејсбук. Ваквата порака од ИВЗ не сакаат да ја коментираат и за да не се нарушува едномесечниот пост на верниците, кој започна од денеска пред изгрејсонце. Тахири не е достапен за коментар и за медиумите.