Денеска сите патишта водат кон Галичник. По 42-ри пат  се подготвува традиционалната галичка свадба. Највозбудени се невестата и зетот, Билјана Гегоска и Филип Белчев од Скопје. Тие за Фактор раскажуваат за значењето и подготовките, честа и возбудата денеска да бидат во центарот на вниманието на оваа традиционална манифестација која претставува вековно културно наследство. Младата Билјана има длабоки галички корени. Таа е ќерка на бајрактарот на Галичките Свадби во 80-тите и 90-тите години и редовен учесник во манифестацијата. Се сеќава дека на само шест години била учесник во спотот на големиот македонски пејач Александар  Сариевски  во кој Галичник е претставен како вистинска природна  атракција поради неговата автентична архитектура, богатото културно наследство и восхитувачките пејзажи. Денеска нагласува, во нејзините очи родното место е уште поживописно и поубаво, бидејќи очите на јавноста ќе бидат свртени токму во неа и нејзиниот избраник. “Возбудени сме, среќни сме, благодарни сме...Галичник, Мајовци, Црквата ″Св. Петар и Павле″ од клепан камен, бајракот и горското цвеќе со кое е накитен, коњаници, петлици, борини, чешмата Упија, тешкото, не се само зборови кои се зборуваат кога се споменува манифестацијата Галичка Свадба. Тоа се зборови кои ги носи нашата душа и ние сме оние кои ја продолжуваат традицијата како фамилија со Галичко потекло, со корен од Геговци, Крсте, Ѓорѓи, Крсте...За нас и не е Галичка свадба- манифестација, туку е овековечување на нашата љубов, како што и нашето  и учеството на нашите фамилии нема да биде улога, туку ќе претставува чекорење по стапките на нашите предци”-вели невестата Билјана Гегоска. Денеска во попладневните часови, од Укален ќе одекне екот на зурлите и тапаните, со што ќе го најават почетокот на вековната традиционална Петровденска галичка свадба. Вечерта, автентично пред куќата на младоженецот и пред куќата на невестата и низ Галичник, автентично ќе бидат изведени десетина свадбарски обичаи, ќе бидат испеани и многу свадбарски и обичајни песни. Утре на Петровден, младите ќе се венчаат во импозантниот храм „Свети Петар и Павле“, каде што пред Бога ќе си ветат долговечен, верен, заеднички живот исполнет со многу дечиња. Свадбарските адети за младоженецот Филип се несекојдневно искуство. “До сега Билјана заедно со нејзиното семејство учествувала многу пати на Галичката свадба.  За мене и мојата фамилија е особена чест и им е огромно задоволство што имаме  ваква прилика.Прв пат оваа манифестација ја гледав лани и знаејќи колкава е желбата и гордоста за Билјана и ние да бидеме дел од неа, бев иницијатор да се пријавиме на конкурсот. Честа ни припадна нам. Неможам со зборови да го опишам чувството. Покрај оваа традиционална свадба планираме и како би ја нарекле класична свадбена прослава во септември. Но верувајте ова за нас е најголемиот триумф и задоволство”-вели младоженецот Филип Белчев. Поканата, додаваат среќните младоженци е отворена за сите бидејќи има што да се види, а случајните и намерните минувачи ќе можат да бидат дел од  најзначајниот настан за Галичник, да пробаат од галичките специјалитети и да уживаат во несекојдневната природа во срцето на Мијачијата.  Не само природната убавина и глетката која ја пружа ова место, не само колоритот на носиите и вековните традиции, обичаи, туку и звукот  на тапаните и зурлите кој овие два дена  е неповторлив- овој настан  за нив велат нема да биде улога туку чекорење по стапките на нивните предци. С.Б.