После завршувањето на натпартискиот граѓански собир кој го организираше опозициската СДСМ, и како што најави лидерот на таа партија Зоран Заев, вечерва граѓани заедно со него остануваат пред Влада.

Таму е и градоначалникот на општина Центар Андреј Жерновски.

Организаторите ги поставија шаторите и ќебињата а според над 4600 лица ќе останат на улица до конечното паѓање од власт на Груевски.

Во денешниот протест учествуваа десетици илјади граѓани од сите краишта на Македонија.

Социјалдемократите имаат намера протестите да продолжат секоја вечер, додека не биде исполнето нивното барање за оставка на Груевски и целата влада.

Граѓаните времето го поминуваат играјќи шах, читајќи книги, коментирајќи разно разни теми ...

Владејачката партија ВМРО-ДПМНЕ пак утре организира општонароден митинг како што велат „во поддршка на стабилна и силна Македонија“.

Претходно денеска, за време на антивладиниот митинг Заев ги повика учесниците да останат на улица до оставка на Груевски.

„Ние мора да останеме тука пред владата! Никола Груевски треба да поднесе оставка. Додека не си отиде, нема да ја напуштиме оваа локација“, изјави тој пред демонстрантите во Скопје.

„Се надевам дека тој не мисли дека ако продолжи така, тоа е во негов интерес“.

„Тој копа уште подлабока дупка за себе и колку поскоро поднесе оставка, толку подобро за сите во Македонија“.

Премиерот Груевски вети дека нема да се повлече и свика контрапротест утре во Скопје.

Како одраз на контролата над медиумите, државната телевизија МРТ дури не соопшти за митингот, иако според некои проценки имало над 100 илјади луѓе.