Претседателот на Словенија,  Борут Пахор за време на претседателската кампања тргна на пат низ Словенија и за седум дена планира да ја обиколи државата. 

Негова крајна дестинација е Пиран, јавуваат тамошните медиуми.

Пахор и неговиот мал тим, во кој е и неговиот син Лука и две претставнички за односи со јавноста, тргнаа вчера попладне добро расположени со ранци од Ходоша во близина на границата со Унгарија, а секој ден планираат да поминат по 40 километри сѐ додека не стигнат до море.

Во Пиран, според планот, ќе стигнат в понеделник, а веќе во вторник претседателот има обврски. За разгледување на словенечката природа, Пахор го користи својот одмор и поставува фотографии од патувањето.

Едни го фалат заради неговиот младешки изглед и добрата физичка кондиција, а политичките опоненти го критикуваат за популизмот и велат дека Пахор е заведен од социјалните мрежи повеќе од американскиот претседател, Доналд Трамп. Пахор и претходно го нарекуваа крал на „Инстаграм“.

На Пахор мандатот му истекнува оваа година, а точниот датум на новите избори ќе се знае в петок.

Според медиумите, Пахор засега е фаворит.