На вкупно 1.100 локации низ Скопје ќе бидат постави нови унифицирани рекламни паноа кој денеска ги промовираше градоначалникот Коце Трајановски. Според најавите ќе се постават 800 билборди, 252 сити лајти и 48 LCD панели. -        На двата јавни огласи што ги распиша Градот Скопје за поставување рекламни паноа на подрачјето на градот се избрани 4 концесионери. Со компаниите „Акцент медиа“, „Скрин – медиа“ и „Кала плакат“ се веќе потпишани договори за користење локации за поставување рекламни паноа, а со компанијата „Медиа – С“ се финализира постапката пред потпишување. Избраните концесионери имаат обврска да постават рекламни паноа на подрачјето на град Скопје според добиениот сопствен пакет, во кој што се прецизирани точните локации и типот и обликот на рекламните паноа. Секој концесионер доби пакет со ист број рекламни паноа и тоа, секој концесионер добива по 200 локации за поставување билборд, по 63 локации за сити лајт и по 12 локации за LCD панел. На ваков начин Скопје ќе добие унифицирани билборди, сити лајти и LCD панели, а во исто време ќе се отстранат сите нелегално поставени рекламни паноа. Секој нареден нелегално поставен билборд ќе биде отстранет. Градот Скопје на јавните повици избра 4 компании за да може да има конкуренција во рекламирањето, поточно да нема монопол при изнајмувањето на рекламен простор – рече денеска градоначалникот Трајановски. -        Секој концесионер сам си ги изработува рекламните паноа, според зададениот стандардизиран тип за билборд, сити лајт и LCD панел. Со потпишувањето на договорите со новите концесионери екипите на Градот Скопје почнаа да ги отстрануваат сите стари рекламни паноа од градските јавни површини, а новите концесионери почнаа да ги монтираат новите паноа. За користење на локациите за рекламни паноа секој концесионер е должен на Градот Скопје да му плаќа годишен надоместок од 302.000 евра. На годишно ниво по овој основ во касата на Градот Скопје ќе се слеат 1.208.000 евра – додаде градоначалникот Трајановски.