Дел од активистите од „Шарената револуција“ денеска спроти Собранието направија смеса за бетон.

Тие потоа ставија гласачка кутија, а единствениот гласач го пречкрта „гласачкото ливче“ и го стави во гласачката кутија.

Со оваа герила акција тие алудираат на изјавите на владејачката ВМРО-ДПМНЕ, дека не отстапува од овој датум, дека тој е „бетониран“.

„Шарената револуција“ за утре повикаа на масовен протест што ќе започне од 18 часот пред СЈО.

“Да бидеме точни, да бидеме повеќебројни и да бидеме гласни! На сите да им кажеме јасно и гласно што бараме! Нашето трпение помина! Нема повеќе изговори и бегање од граѓаните што речиси два месеца храбро и истрајно протестираат против овој режим. Во понеделник соопштуваме бескомпромисен план за излез од кризата, со цврсти рокови од кои нема отстапувања. Ја повлекуваме црвената линија! Од понеделник одбројуваме! Кризата траеше доволно долго! Во понеделник, граѓаните и граѓанките ќе кажат како ќе ја надминеме! Нема веќе да нѐ гледаат сам од шест, туку ќе нѐ гледаат секој ден – сѐ посилни!“ - пишуваат во повикот за утрешниот протест.

Тие додаваат дека со овој масовен протест ќе го најават крајот на криминалното владеење во Македонија.