Подготовките за вечерашниот митинг кој треба да започне за помалку од еден час се готови. Бината пред Триумфалната капија во центарот на главниот град е наместена, а граѓани ширум Скопје и земјава полека пристигаат на збирното место пред Собрание. Митингот на владеачката партија ВМРО-ДПМНЕ е закажан за во 20 ч а ќе се одвива под мотото „Македонија силна“. Се очекува збор да имаат повеќемина говорници, а последен говор ќе одржи лидерот на оваа партија и премиер Никола Груевски. Првите автобуси со приврзаници на владините политики пристигнуваат во Скопје. Од Штип тргнале 45 автобуси, слична бројка и од Битола и Прилеп, од Охрид двесетина автобуси и 30 комбиња, колку што се очекуваат и од Велес, Кавадарци и други општини. Од ВМРО –ДПМНЕ велат дека главната порака од собирот ќе биде силна и стабилна Македонија која ќе се бори за нови работни места, реформи, економски курс, а не за политички подметнувања. Во функција на набљудувач и вечерва ќе биде европарламентарецот Ричард Ховит, кој вечера беше дел и од митингот на опозицијата.