Главните сообраќајници во Брисел ноќеска биле затворени поради големиот број трактори кои пристигнале на масовниот протест на произведувачите на млеко.

Белгиските млекари, кои протестираат поради ниските цени на млекото, планирале во главниот град на Белгија да донесат дури 5000 трактори, а доѓањето на првата група машини веќе предизвикало затварање на главните тунели и авении кои водат во центарот на градот.

Организаторите планирале конвојот на земјоделските машини да помине низ центарот на градот и на крај да запре на бриселскиот плоштад Шуман каде е седиштето на повеќето евроспки институции.

Градските власти апелирале на возачите да не користат автомобили без итна потреба, а градот го надлетуваат полициски хеликоптери.

Млекарите бараат да им се вратат субвенциите и ограничениот увоз на млеко откако белгиската влада, повикувајќи се на прописите на ЕУ, во последните години постепено ги запира субвенциите за земјоделците, и го отворила својот пазар за увоз на поевтино млеко од странство.

Тоа само во оваа година влијаело до поефтинување на млекото од околу 25 одсто, а фармерите тврдат дека им се заканува банкрот ако повторно не го воведат стариот систем на субвенции и царини на увозното млеко.