Шефицата на Европската комисија, Урсула фон дер Лајен изјави дека Европската унија мора да подготви кризен план за 27-те земји-членки, со цел да бидат подготвени за целосен прекин на испораките на руски гас поради војната на Кремљ во Украина.

- Сега мораме да се подготвиме за понатамошни прекини во снабдувањето со гас, па дури и целосен прекин на испораките на руски гас - рече Фон дер Лајен во Европскиот парламент во Стразбур.

Таа наведе дека десетина членки на ЕУ веќе се погодени од намалувањето или целосниот прекин на испораките на руски гас, а политичкиот конфликт со Москва се интензивира поради инвазијата на Украина.

- Очигледно, Путин продолжува да ја користи енергијата како оружје. Затоа Комисијата работи на европски план за вонредни состојби. Треба да обезбедиме во случај на целосно затемнување, гасот да тече таму каде што е најпотребно. Треба да обезбедиме европска солидарност - нагласи Фон дер Лајен.

Земјите на ЕУ веќе се согласија минатиот месец дека сите капацитети за складирање на природен гас во блокот од 27 земји треба да бидат исполнети до најмалку 80 отсто од капацитетот за следната зима за да се избегнат недостигот во студената сезона. Новата регулатива, исто така, наложува дека подземните складишта за гас на почвата на ЕУ мора да се наполнат до 90 проценти пред зимата 2023/2024 година.

Војната во Украина ја поттикна ЕУ да ја преиспита својата енергетска политика и да стави крај на зависноста од руските фосилни горива. Земјите-членки одлучија да забранат 90 отсто од увозот на руска нафта до крајот на оваа година, покрај забраната за увоз на руски јаглен што ќе стапи на сила во август. Рускиот гас не е покриен со санкциите од Брисел.

Со цел да се намали употребата на руската енергија, Европската комисија ја диверзифицира својата мрежа на снабдувачи.

- Нашите напори веќе прават голема разлика. Од март, глобалниот извоз на течен природен гас (ТНГ) во Европа се зголеми за 75 проценти во споредба со 2021 година. Извозот на течен природен гас (ТНГ) од САД во Европа е речиси тројно зголемен - рече шефицата на ЕК.

Во исто време, просечниот месечен увоз на руски гас преку цевководи е намален за 33 отсто во споредба со минатата година, додаде Фон дер Лајен, повикувајќи ги земјите од ЕУ брзо да преминат кон обновливи извори на енергија.

- Некои велат дека во новото безбедносно опкружување по агресијата на Русија, мораме да забавиме со зелената транзиција. Тие велат дека оваа транзиција би била „по цена на основната безбедност“. Вистината е спротивна. Ако не направиме ништо друго освен се натпреваруваме за ограничената понуда на фосилни горива, цените дополнително ќе експлодираат и ќе ја полнат воената каса на Путин. Обновливите извори на енергија се домашни. Тие ни даваат независност од руските фосилни горива. Тие се поисплатливи и почисти - заклучи таа.

Советот на ЕУ во јуни се согласи да го зголеми уделот на обновливите извори на енергија во енергетскиот микс на блокот на најмалку 40 отсто до 2030 година, што е повеќе од претходната цел од 32 отсто. Дополнително, целта за намалување на потрошувачката на енергија за 9,0 проценти во 2030 година за првпат ќе стане обврска за сите земји-членки на ЕУ, наведува агенцијата АП.