Социјалната зграда во Гевгелија ќе овозможи дом за 52 семејства од социјално ранливите категории на граѓани. 

Извршувајќи увид во динамиката на изградба на социјалната зграда во Гевгелија,  генералниот директор на АД за стопанисување со станбен и со деловен простор, Кристијан Трајковски и министерот за транспорт и врски, Благој Бочварски, изразија задоволство од брзината на реализација на градежните активности.

„Се работи за социјален објект со вкупна вредност од 79 милиони денари. Реализацијата на овој објект е 70 отсто завршена и очекувам дека во наредната година овој објект ќе го предадеме на Министерството за транспорт и врски и ќе започне распределбата на сите оние станови кои им се потребни на нашите граѓани од социјална категорија“, изјави генералниот директор, Кристијан Трајковски.

Дополнително, Трајковски нагласи дека наредната година акционерското друштво ќе излезе со значителна понуда на комерцијални станови за граѓаните на РСМ.

„Тука ќе бидат становите коишто ќе им ги понудиме на нашите граѓани по коректни цени во Скопје, Битола, Охрид и во другите градови“, нагласиТрајковски.

„Владата, преку конкретни проекти и инвестиции, овозможува развој на локалните самоуправи и подобрување на животниот стандард на граѓаните. Како партнери на општините, преку инфраструктурните проекти што ги реализираме, имаме за цел да го подобриме животот на граѓаните, да ја раздвижиме економијата и да обезбедиме рамномерен регионале нразвој. И досега тоа успешно го правевме,  за што говорат бројните проекти коишто ги реализираме“, истакна министерот Бочварски.