По предлог на Сашо Наков, еден од најголемите акционери во „Фершпед“ и син на Штерјо Наков, Управниот одбор на компанијата донел одлука за промена на Статутот, ја информираше „Фершпед“ Македонската берза. Првата измена е намалување на бројот на членови во Надзорниот одбор на компанијата од 6 (шест) на 4 (четири) члена. Наков ваквата иницијатива ја објаснува со „обезбдедување на поефикасно и поекономично работење на Надзорниот одбор“. Освен ова еден од најголемите акционери предложил во Статутот да се појасни дека претседателот на Управниот одбор истовремено е и генерален директор на компанијата, додека заменик-претседателот на Управниот одбор е истовремено и заменик-директор. Ваквото појаснување, според Наков, е неопходно „заради прецизирање на надлежностите и обврските на именуваните лица и нивниот деловен статус“. Управниот одбор на компанијата ја прифатил иницијативата на Наков за измена на Статутот и предлог-одлуката ќе ја поднесе на усвојување на Годишното собрание на акционери на „Фершпед“ кое е закажано за 25 април.