Кој ќе ги продаде акциите што ги поседува во Македонска берза на Загребската берза? Два дена откако од Загреб информираа дека ќе го зголемат својот удел во Македонска берза со купување на 276 акции односно Загребската берза ќе докупи уште 9,89 отсто, од берзата во Скопје не соопштија никакви детали. Фактор сепак дознава кој е продавачот на овие акции. Станува збор за Еуростандард банка која моментно е во стечај откако Народната банка во август лани и ја одзема дозволата за работа. Потврда дека станува збор за овие акции се добива и од финансиските извештаи на берза. Во последниот стои дека 276 акции има токму Еуростандард банка. Една акција вреди 607 евра или сите тие вкупно околу 168 илјади евра.

Директорката на Заграбската берза Ивана Гажиќ уште завчера попладнето изјави дека со ова се продлабочуваат веќе добрите врски меѓу двете берзи.

На почетокот на овој месец, двете берзи потпишаа договор за соработка во областа на едукативните услуги што ќе им ги обезбедува на учесниците од Македонија академијата на Загребската берза, а компаниите котирани на Македонската берза учествуваа на конференции за инвестиции организирани од Загребска берза.

„Нашите два пазари се многу блиски. Консолидацијата е природен развојен пат не само за помалите, туку и за глобалните, големи пазари на капитал. Целта е да им се обезбеди поголема видливост на пазарите, и на инвеститорите и компаниите подобра и поекономична услуга, како и повеќе можности и за инвестиции и за прибирање капитал. Долги години успешно соработуваме со нашите колеги од Македонија и нашата намера е понатаму да ја продлабочуваме оваа соработка на заедничко задоволство и придобивка на двете економии, изјави Ивана Гажиќ, претседател на Управниот одбор на Загребската берза.

Со Решението се дава согласност на Загребска берза Д.Д Загреб да стекне квалификува­но учес­тво во Македонска берза АД Скопје, односно да се стекне со акции чиј вкупен кумулативен износ не надминува 20 проценти од вкупно издадените акции со пра­во на глас од Македонска берза АД Скопје.

„Согласно барањето за добивање согласност за стекнување на квалификувано учество во Македонска берза АД Скопје и Одлуката на Надзорниот одбор на Загребачка берза Д.Д Загреб Загребачка берза Д.Д Загреб има намера да стекне 276 акции, односно 9,89 отсто од акциите на Македонска берза АД Скопје со што процентуалното учество би се зголемило од 5,3 проценти на 15,19 проценти од акциите на берзата, стои во документот

Трансакцијата за стекнување на акциите треба да се изврши во рок од 90 календарски денови од денот на добивање на согласноста.