НАЈДЕНО Е РЕШЕНИЕ ЗА ПРЕВОЗНИЦИТЕ

Македонските превозници вечерва ќе се повлечат од блокадите на граничните премини. 

Tие во 20 часот ќе се повлечат од блокадите на товарниот дел од граничните премини, одлучи попладнево на состанок Aсоцијацијата Макам-транс“,  откако Европската комисија  донесе одлука за носење нова стратегија за визи која ќе значи решавање на проблемот со кој се соочија професионалните возачи, за престојот 90 во 180 дена во шенген-зоната.

По речиси четиридневен застој ќе се нормализира товарниот сообраќај на премините  „Деве Баир“, „Делчево“, „Ново Село“, „Дојран“, „Богородица“, „Меџитлија“, „Ќафасан“, „Блаце“, „Блато“ и „Стење“ за влез и излез од државата.

„Макам-транс“ во објава на Фејсбук наведе дека се повлекуваат од блокадите, бидејќи со одлуката на ЕУ е добиена потврдата која ја очекувале за промени и се заблагодари на сите кои, како што велат,  неуморно во изминатите денови ја дадоа својата поддршка и солидарност со блокадата на граничните премини.

Претходно, вицепремиерот и министер за транспорт Александар Николоски објави дека Брисел ќе донесе нова стратегија за визи, која ќе значи решавање на проблемот на превозниците.

ФИНАНСИСКА ПОЛИЦИЈА МУ ПОДНЕСЕ ПРИЈАВА НА МАРКО БИСЛИМОВСКИ

Претседателот на Регулаторната комисија за енергетика (РКЕ), Марко Бислимоски вели дека ќе го следи процесот и нема да дозволи да му го извалкаат името, откако Управата за финансиска полиција му поднесе кривична пријава за злоупотреба на службената положба и овластувања.

„Сè што стои на располагање, јас ќе го дадам на соодветните институции и цврсто сум сигурен дека ќе докажеме дека апсолутно немало никакво прекршување, ниту на Законот за енергетика, ниту на Правилникот за лиценцирање“, нагласи Бислимоски.

МИЦКОСКИ ВЕЛИ ДЕКА РАБОТНИЦИТЕ ТРЕБА ДА БАРААТ ПОВИСОКИ ПЛАТИ ОД ГАЗДИТЕ

Премиерот Христијан Мицкоски по синоќешниот протест на ССМ, денеска како одговор на пратеничко прашање во Собранието на работниците им порача дека Владата не е адреса на која треба да бараат вонредно зголемување на минималната плата на 600 евра.

- Прво и најважно - Владата е таа која посредува во бипартидниот дијалог помеѓу работници и работодавачи. Второ - принципиелно ја поддржувам секоја демократска иницијатива на секој работник за своето право. Секој работник кој сака повисока треба да се поддржи, но тоа да е надпартиски.

КАРАКАМИШЕВА СТАНА СОВЕТНИЧКА НА МИЦКОСКИ

Професорката на Правниот факултет Јустинијан Први, Тања Каракамишева стана советничка на премиерот Христијан Мицкоски.

Веста ја сподели професорката на социјалните мрежи.

„Со голема чест и задоволство објавувам дека сум ангажирана за Советник од областа на човековите права и владеењето на правото од страна на Претседателот на Владата, проф. д-р Христијан Мицкоски. Голема благодарност за дадената доверба која е плод на нашата повеќегодишна соработка. Голем предизвик и одговорност е да се биде советник за најчувствителната правна материја која ги опфаќа сите материјални и формални аспекти на македонскиот систем, но и меѓународната позиција на човековите права и владеењето на правото. Ветувам голема посветеност и професионалност во извршувањето на доделените обврски, но и многу повеќе од тоа“, стои во објавата на професорката.

ЧИТАЈТЕ УШТЕ

Телеком Србија преку телекомуникацискиот оператор Мтел стана целосен сопственик на Тотал ТВ во Македонија, согласно претходно потпишаните договори, со кои сателитската ТВ услуга EON SAT е продадена од страна на United Group.

Се зголемува бројот на доктори на науки и магистри кои ја напуштаат Македонија. Ако ги споредиме податоците на Државниот завод за статистика(ДЗС), тие покажуваат дека последниве години има поголем број на магистри и доктори на науки кои се иселуваат.

Вработените во Регулаторната комисијата за домување се меѓу малкуте државни службеници, или вработени кои добиваат солидна плата. Иако генерално лицата кои се дел од ова тело остануваат анонимни за јавноста, сепак, од самото основање на ова тело нивните плати биле меѓу попримамливите.