Сите информации поврзани со случајот „Актор“ се испитуваат и од страна на Европската инвестициска банка, која е главен кредитор на проектот за изградба на автопатската делница Демир Капија - Смоквица. Од ЕИБ велат дека сите обвинувања за измама и корупција од страна на грчката градежна компанија ангажирана во овој случај се проследени до Генералниот инспекторат на Банката, кој треба да провери дали се работело во согласност со политиките на ЕИБ за нулта толеранција на измама и корупција. Од Европската инвестициска банка го појаснуваат и начинот на кој секој граѓанин може да пријави корупција или измама во проектите што ги финансира оваа институција. Пријавите можат да се достават на:

1. со пополнување на онлајн формуларот Reporting on Fraud or corruption form
2. преку електронска пошта investigations@eib.org
3. преку писмо до Шефот на Одделот за истраги на измами при Европската инвестициска банка на адреса:  - Head of the Fraud Investigation Division, European Investment Bank, 100 Bd. Konrad Adenauer, L-2950 Luxembourg;
4. преку факс на бројот: + 352 4379 6 4000

Од Европската инвестициска банка ги охрабруваат сите граѓани кои имаат некакви информации поврзани и со овој случај, веднаш да ги достават користејќи еден од овие канали. Сите пријави за корупција и измама на проекти поврзани со ЕИБ се анонимни и банката ги третира како строго доверливи. Притоа треба да се испрати колку што е можно подетално објаснување со име на проектот на кој била забележана неправилност, какви неправилности се забележани и кој ги врши, каде и кога била извршена измамата.