Европа се соочува со сериозна енергетска и економска криза, предупреди унгарскиот премиер Виктор Орбан, повикувајќи на итна промена на политиката на Европската унија кон руските енергенси.

Во реакција на критиките од полскиот премиер Доналд Туск, кој оцени дека ставовите на Орбан и Доналд Трамп личат на „план од соништата на Путин“, Орбан порача дека Европа се движи кон една од најтешките економски кризи во својата историја.

• Европа оди кон една од најсериозните економски кризи. Светот се соочува со голема енергетска криза, а Европа е во сериозна опасност. Единствениот излез е укинување на санкциите за руската енергија – веднаш – изјави Орбан.

Тој додаде дека фокусот не треба да биде на рускиот претседател, туку на интересите на европските држави и нивните граѓани.

• Не мора да размислуваме за Путин, туку за нашите земји и нашиот народ – нагласи Орбан.

Во исто време, му порача на Туск дека наместо, како што рече, „да поттикнува воена реторика“, треба да се фокусира на заштита на сопствената држава.

Овие изјави доаѓаат во чувствителен политички момент – само десет дена пред парламентарните избори во Унгарија, што дополнително ја засилува тежината на неговите пораки во јавноста.

Ставовите на Орбан повторно ја отвораат дебатата во ЕУ околу енергетската зависност, санкциите и стратегијата за справување со кризата, која сè повеќе се продлабочува.