Амбициозниот план за изградба на подводен железнички тунел што би ги поврзал Африка и Европа доби нов импулс по студијата за изводливост, која потврди дека проектот е технички можен со примена на современи технологии за дупчење. Тунелот би поминувал под Гибралтарскиот Проток и би ги поврзувал Шпанија и Мароко, но експертите предупредуваат дека роковите за изградба се поместени поради раната фаза и сложеноста на проектот.

Според плановите, тунелот ќе биде долг околу 42 километри, а речиси 27 километри од трасата ќе бидат потопени под површината на морето. Иако конечната длабочина не е прецизно утврдена, проценките велат дека би можел да се наоѓа на околу 420 метри под нивото на морето, што е значително подлабоко од тунелот под Ламанш, чија максимална длабочина е 74 метри.

Проектот е вреден 8,7 милијарди евра

Студијата за изводливост ја спроведоа германски експерти за тунели од компанијата Херенкнехт, по налог на Владата на Шпанија. Заклучокот од студијата е дека дупчењето железнички тунел е можно со примена на постојната технологија. Проектот се проценува на околу 8,7 милијарди евра.

Експертите во моментов дополнително ја анализираат изводливоста за изградба на клучни делови под прагот Камаринал, подводна област карактеризирана со исклучително сложени геолошки услови, што претставува најсложениот сегмент од проектот.

Се очекува шпанската консултантска компанија Инеко да изработи детален дизајн до 2027 година, со надеж дека шпанската влада би можела да го одобри проектот истата година. Побрз транспорт на стока и патници ќе има, но не до 2030 година.

Првичниот план тунелот да биде завршен до 2030 година, што ќе се совпадне со Светското првенство во фудбал, чии домаќини се Шпанија, Португалија и Мароко, беше оценет како нереален.

foto Grok