Еврокомесарот Јоханес Хан, испратил писмо до лидерите на четирите партии, потписнички на Договорот од Пржино, Никола Груевски, Зоран Заев, Али Ахмети и Мендух Тачи, јави Алсат-М.

Телевизијата се повикува на дипломатски извори, според кои меѓународниот фактор инсистира на нова средба откако се откажа состанокот во Виена.

„Страните повторно да почнат дијалог и неопходно да најдат компромисно решение. Да се спроведат сите реформи, да се прочисти избирачкиот список заедно со реформите во медиумите. Изборите неопходно е да бидат сеопфатни“ - велат дека е содржината на писмото од Брисел испратено преку амбасадорот на ЕУ во Македонија, Аиво Орав.

Политичките партии не ја коментираат содржината на писмото на комесарот кој побарал и омекнување на ставовите и компромис за излез од политичката криза. Тие не негираат дека добиле вакво писмо, иако велат дека тоа било адресирано до оние субјекти кои отстапиле од политичкиот договор.