Европската унија побара од САД во рок од шест месеци да го укинат визниот режим за државјаните на Полска, Романија, Бугарија, Хрватска и Кипар. „Доколку тој проблем не се реши за шест месеци, ЕУ може да воведе визи за американските дипломати“, предупреди Комисијата. Граѓаните на повеќето земји-членки на ЕУ патуваат без визи во многу земји надвор од Унијата, но на жителите на новите европски членки се уште им требаат визи за САД, Канада и Австралија. Комисијата слично предупредување му испрати на Вашингтон и во 2008 година, кога 12 земји-членки на ЕУ се уште имаа визен режим за патување во САД. Во меѓувреме, визите беа укинати за осум земји - Чешка, Естонија, Грција, Литванија, Летонија, Унгарија, Малта и за Словачка, а на листата останаа Полска, Романија, Бугарија, Кипар и Хрватска која тукушто стана членка на Унијата. Дипломатите од овие пет земји и билатерално преговараат со САД за да се реши овој проблем. Информациите за укинување на визниот режим на САД кон овие земји ги засегаат и Македонците кои поседуваат бугарски, хрватски, полски, романски или кипарски пасош.