Турскиот претседател Реџеп Таип Ердоган пристигна во официјална посета на Белград. Ердоган нешто по 21 часот слета на белградскиот аеродром, каде што го пречека претседателот на Србија, Александар Вучиќ. Свечен прием за турскиот претседател ќе се одржи денес во 11 часот пред Палатата Србија, каде домаќин ќе биде претседателот на Србија. Двајцата лидери прво ќе имаат билатерална средба, а потоа делегациите на двете земји ќе разговараат и во Палатата Србија.

Турскиот претседател допатува во Белград со голема делегација, меѓу кои и турскиот министер за надворешни работи Мевлут Чавушоглу, кој пред неколку дена присуствуваше на Самитот „Отворен Балкан“. Ердоган во Белград пристигна од Сараево, каде разговараше со претставници на Босна и Херцеговина, а посетата на регионот ќе ја заврши на 8 септември со посета на Хрватска.

Посетата на турскиот претседател доаѓа во време кога меѓународната заедница е особено фокусирана на проблемите во регионот, особено на дијалогот меѓу Белград и Приштина. Вака претседателот на Србија го најави доаѓањето на Ердоган кога зборуваше за претстојните важни посети и средби.

Дека Ердоган ќе го посети Белград, минатата недела потврди и министерот за надворешни работи на таа земја Мевлут Чавушоглу, кој присуствуваше на самитот на иницијативата Отворен Балкан, кој беше поддржан од Турција. Тогаш Чавушоглу посочи дека има два предизвици за Турција во овој регион, од кои едниот е дијалогот меѓу Белград и Приштина.

Ситуацијата во БиХ ќе биде наш приоритет. Не можеме да дозволиме да постои конфликт во срцето на Балканот. Друг предизвик е дијалогот меѓу Белград и Приштина, кој покажа колку е неопходно да се концентрираме на заедничките интереси - рече Чавушоглу.

Тој посочи дека Турција е горда што е дел од Балканот и ја отфрла вештачката поделба на запад и исток.

„Балканот треба да ја земе својата судбина во свои раце и да ги отстрани сите пречки за да напредува побрзо и да постигне поголем просперитет. Оваа иницијатива ја дава таа можност и е нешто ветувачко“, рече турскиот министер за надворешни работи Мевлут Чавушоглу на отворањето на „Отворен Балкан“.

Турскиот министер за надворешни работи за време на престојот во Србија се сретна и со неговиот српски колега Никола Селаковиќ.

Министерот Селаковиќ по разговорот посочи дека односите меѓу Србија и Турција се на највисоко ниво во поновата историја, за што несомнено придонесе добриот личен и професионален однос на двајцата претседатели Александар Вучиќ и Реџеп Таип Ердоган. На средбата се разговараше и за актуелната состојба и дијалогот меѓу Белград и Приштина, како и за други регионални теми и економската соработка.

Чавушоглу и Селаковиќ потоа изразија уверување дека посетата на претседателот Ердоган на Србија и планираното потпишување на голем број меѓудржавни договори ќе дадат дополнителен поттик за развојот на севкупните билатерални односи.

Фото: Инстаграм Screenshot