Револтот, протестите и немирите поврзани со реакциите на работниците во најголемата фабрика за iPhone во светот во централна Кина го спречија снабдувањето на Apple, што според аналитичарите е голем проблем кој се одразува на снабдувањето на големите технолошки компании, како резултат на строгата политика на земјата за нулта Ковид.

Проблемите започнаа минатиот месец кога работниците го напуштија фабричкиот кампус во Женгжу, главниот град на централната провинција Хенан, поради стравувањата од Ковид. За да се обнови персоналот, на работниците им беа понудени бонуси.

Но, протестите и немирите кои избија изминатиов период кога новиот персонал рече дека раководството не ги исполнило своите ветувања ги пренесоа сите светски медиуми. Потоа зачестија изјавите дека тајванската фирма за производство Фокскон, врвен добавувач на Apple кој го поседува објектот ќе го забрза темпото на диверзификација од Кина во други земји како Индија.

Даниел Ајвс, управен директор за истражување на капиталот во Wedbush Securities, изјави за CNN Business дека затворање на производството во во централниот кинески град Женгжу е „загуба“ за Apple.

- Секоја недела од ова исклучување и немири, ние проценуваме дека го чини Apple приближно 1 милијарда долари неделно во изгубената продажба на iPhone. Сега приближно 5 отсто од продажбата на iPhone 14 е надвор од дофатот поради овие брутални исклучувања во Кина - рече тој.

Побарувачката за iPhone 14 за време на црниот петок беше многу поголема од понудата и може да предизвика големи недостиг што ќе трае до Божиќ, рече Ајвс, додавајќи дека прекините во Foxconn, кои започнаа во октомври, беа голем „удар“ за Apple овој квартал. Ајвс рече дека проверките во продавницата на Црниот петок покажуваат големи недостиг на iPhone во целиот свет.

„Врз основа на нашата анализа, веруваме дека недостигот на iPhone 14 Pro стана многу полош во текот на минатата недела со многу ниски залихи“, напиша тој. „Веруваме дека многу продавници на Apple сега имаат недостиг на iPhone 14 Pro… 25 - 30 отсто под нормалното, во еден типичен декември“.

Минг-Чи Куо, аналитичар во TF International Securities, напиша на Твитер дека повеќе од 10 проценти од глобалниот капацитет за производство на iPhone е погоден од ситуацијата во кампусот Женгжу.

Претходно овој месец, Apple соопшти дека испораките на нејзината најнова линија на iPhone телефони ќе бидат „привремено под влијание“ на ограничувањата за Ковид во Кина. Беше кажно дека капацитетот за склопување во Женгжу, во кој вообичаено се сместени околу 200.000 работници, работи со значително намален капацитет, поради ограничувањата на Ковид.

Кампусот Женгжу се бори со Ковид од средината на октомври што предизвика паника кај неговите работници. Видеата на луѓе кои го напуштаат Женгжу пеш станаа вирални на кинеските социјални мрежи на почетокот на ноември, принудувајќи го Foxconn да ги засили мерките за враќање на својот персонал.

За да ги привлече работниците, компанијата соопшти дека ги зголемила дневните бонуси за работниците во фабриката за четири пати. Пред една недела државните медиуми објавија дека 100.000 луѓе биле успешно регрутирани за пополнување на испразнетите позиции.

Дури и пред демонстрациите оваа недела, Apple започна со производство на iPhone 14 во Индија, бидејќи се обидуваше да го диверзифицира својот синџир на снабдување подалеку од Кина.

Објавата кон крајот на септември означи голема промена во нејзината стратегија и дојде во време кога американските технолошки компании бараа алтернативи за Кина, светската фабрика со децении. Компанијата сака да го зајакне производството во земји како Виетнам и Индија, наведувајќи ја строгата политика на Кина за Ковид како една од причините.

Куо на Твитер соопшти дека Foxconn ќе го забрза проширувањето на капацитетот за производство на iPhone во Индија.

- Производството на iPhone телефони од Foxconn во Индија ќе порасне за најмалку 150 отсто во 2023 година во споредба со 2022 година, а долгорочна цел ќе биде испорака помеѓу 40 и 45 проценти од таквите телефони од Индија, во споредба со помалку од 4 отсто сега - пиша Коу.