Шведската мултинационална компанија „Електролукс“ го претстави планот за реструктурирање со кој се предвидува укинување на околу 1.700 работни места во Италија и затворање на фабриката во местото Черето д’Еси во регионот Марке, каде се вработени приближно 170 лица. По ваквата најава, водечките италијански синдикати на индустриските работници прогласија осумчасовен национален штрајк, кој ќе се одржи во секоја од фабриките.

Според соопштението на синдикатите, компанијата со седиште во Стокхолм ја потврдила својата намера да го прекине производството на аспиратори во Италија и да го пресели во Полска, пренесува „Анса“.

Планот беше презентиран во Местре, а синдикатите FIM, FIOM и UILM го оценија како „неприфатлив“ и веднаш прогласија мобилизација на работниците, со најава за осумчасовен штрајк во сите италијански погони.