Иницијативата „Студентски пленум“ денеска ги повикува студентите на голем студентски собир на кој ќе го изразат своето незадоволство од плановите за воведување екстерно тестирање и да побараат за оваа точка да расправа и да заземе став Сенатот на Универзитетот “Кирил и Методиј“. Предвидено е собирот да се одржи на пладне пред Ректоратот на УКИМ. „Студентски пленум е автентична иницијатива покрената од самите студенти која се оградува од било какво партиско влијание, затоа ве охрабруваме да продолжите да доаѓате на студентските пленуми како независни студенти и да зборувате од свое име, со што ќе можеме да дојдеме до заедничко решение кое на сите ни одговара“, стои во повикот.