Грчкиот железнички оператор „Траиносе“ ќе се приватизира. Европската комисија ја одобри процедурата за приватизацијата и наскоро ќе биде објавен тендер за продажба на компанијата, објави грчкиот весник „Етнос“.

- Со преструктурирањето на „Траиносе“ и претстојната приватизација, компанијата повеќе нема да добива државни субвенции, се гарантира нејзино заздравување и развој и ја прави конкурентна во согласност со европските норми, се наведува во писмото од ЕК до грчките власти.

Грчкиот министер за инфраструктура, транспорт и информации, Михалис Христохоидис, истакна дека приватизацијата на „Траиносе“ „ќе донесе бенифиции за работењето на компанијата и нови инвестиции“.

На тендерот, покрај кинескиот гигант „КОСКО кој покажа голем интерес за оваа компанија,  ќе учествуваат и руски и француски железнички компании. Интерес покажале и една романска и две американски компании.