Јавниот долг на Македонија годинава ќе се зголеми за 2%, прогнозира Европската комисија. Долгот, кој лани бил 35,4% од БДП, годинава се очекува да достигне 37,4%, а в година дури 38,9% од БДП. По ланските 4%, буџетскиот дефицит на земјава се предвидува годинава да се намали на 3,8% од БДП. Комисијата препорачува понизок дефицит за Македонија, со цел да не се зголемува дополнително јавниот долг. „Сепак, вкупниот јавен долг, кој го вклучува и долгот на претпријатијата во државна сопственост, јавните агенции и јавните финансиски институции, најверојатно ќе биде значително повисок. Тоа, исто така би го опфатило и новоформираното Јавно претпријатие за државни патишта преку кое Владата ќе ги канализира значајните трошоци за патна инфраструктура, а кое може да позајмува во свое име со долг гарантиран од Владата“, наведуваат од Еврокомисијата. Според прогнозите на Европската комисија, македонската економија годинава ќе расте со стапка од 2,5 проценти.