Албанскиот премиер Еди Рама потврди дека дел од новото пристаниште Порто Романо во Драч ќе биде база на НАТО.

Тој ова го изјави по враќањето од самитот на НАТО што оваа недела се одржа во Мадрид.

Се планира пристаништето Порто Романо да биде најголемото трговско пристаниште на Јадранот, но Рама рече дека ќе има и воен дел.

„Наскоро ќе се вратиме во Брисел за да продолжиме со дискусиите за нашиот предлог за формирање на поморска база на НАТО во новото пристаниште Драч“, изјави Рама, пренесуваат албанските медиуми.

Тој додаде дека воената база ќе биде изградена и кофинансирана од Албанија и НАТО.

Доколку се изгради, таа база нема да биде единствената база на НАТО во поранешната комунистичка Албанија.

Претходно во Кучова започна изградбата на воздушната база на НАТО, со странско финансирање.

Тоа ќе биде првата воздушна база на НАТО во Западен Балкан.