Германската телекомуникациска група „Дојче Телеком“ размислува за спојување со својата американска подружница „Т-Мобиле УС“, објави Ројтерс, повикувајќи се на два извора запознаени со процесот.

„Дојче Телеком“ веќе поседува 53 отсто од акциите во „Т-Мобиле“, но евентуалната трансакција ќе бара одобрение од германската држава, која е најголем поединечен акционер во компанијата.

Германија има удел од околу 28 проценти во „Дојче Телеком“, поделен меѓу владата и државната финансиска институција КfW.

Од „Дојче Телеком“ одбиле да ги коментираат информациите, додека „Т-Мобиле“ и германската влада засега не одговориле на барањата за коментар.

Според Ројтерс, европските телекомуникациски компании се соочуваат со големи долгови, силна конкуренција и фрагментирани пазари, поради што бараат нови начини за раст.

Доколку дојде до спојување, новата компанија би имала пазарна вредност од околу 400 милијарди долари, што би ја зголемило ликвидноста и би овозможило полесно склучување идни договори.

Во моментов, пазарната вредност на „Дојче Телеком“ се проценува на околу 166 милијарди долари, додека „Т-Мобиле“ вреди околу 218 милијарди долари.

Вакво спојување би го надминало досегашниот рекорд – аквизицијата на „Манесман“ од страна на „Водафон“ во 1999 година, вредна 202,7 милијарди долари, што важи за една од најголемите зделки во историјата на телекомуникацискиот сектор.