Демократската унија за интеграција (ДУИ) во следниот владин состав ќе има прв човек во ресорот образование, објави телевизијата Алсат-М.

Според информациите на оваа телевизија, како веќе извесен кандидат на ДУИ за министер за образование се споменува Абдилаќим Адеми, досегашниот министер за животна средина.

Токму Министерството за образование, а не она за труд и социјална политика било позицијата заради која ДУИ прифати да се откаже од ресорот одбрана, каде што на местото на Талат Џафери во иднина ќе седи Емил Димитриев, тврди Алсат-М.

Според овие информации, нов министер за правда ќе биде Аднан Јашари, а Лирим Шабани, ќе биде нов министер за локална самоуправа. Беким Незири, според информациите на Алсат М, ќе биде новиот министер за економија, а за министерското место за екологија најсериозен кандидат е Хазби Лика.

ВМРО-ДПМНЕ и ДУИ ги финализираа преговорите за новиот владин состав, но детално распоредот на ресорите се уште официјално не се објавува.