Демократскиот сојуз смета дека политичката состојба се заострува, при што поради отсуство на чувство за одговорност и државност, Ѓорге Иванов, се уште се колеба дали да ја повлече аболицијата или не.

Го охрабруваат  дека во интерес на граѓаните, стабилноста на државата и правдата е да ја повлече аболицијата. Тој потег, заедно со одлагање на изборите, се основа за политички договор и постепено враќање на вербата во правдата, велат од ДС. Партијата предлага и мерки и чекори кои понатаму треба да бидат преземени.

„Избор на експертска влада, поддржана од сите партии, која ќе работи на коренити реформи на правосудниот и безбедносниот систем, како и во медиумите, изборните регулативи (избирачки список, Македонија да биде една изборна единица, електронско гласање и др.), демократизација на партиите и друго. Деблокада на сите државни институции и нивна департизација и деполитизација. Поддршка на СЈО за професионално, стручно, законито и транспарентно работење и формирање на специјализирано судско одделение во рамките на Кривичниот суд во Скопје. Создавање на услови за одговорност на креаторите на политичката криза и донесување на закон за забрана на нивно политичко дејствување. Реформи неопходни за членство во НАТО и започнување на преговорите за влез во ЕУ“ - се вели во соопштението од ДС.

Партијата оценува дека доколку и натаму се продолжи со ароганцијата од власта и медиумската манипулација, протестите ќе продолжат, стабилноста ќе се наруши и сето тоа ќе се рефлектира и на економски и безбедносен план. Велат дека на крај сè ќе се прифати, но цената и штетите ќе бидат преголеми.