Од Демократскиот сојуз велат дека кулата од карти се распаѓа, а досега невидената манипулативна кампања почна да го губи здивот и станува контра продуктивна.

Во партиското соопштение велат дека „успесите” на власта не можат да ја покријат аболицијата за корумпираните политичари, блокадата на СЈО, подготовките за изборен фалсификат затоа што не се прочисти избирачкиот список и  најавите од Европската Унија за санкции за државно политичкиот врв и државата.

„Не можеме да поверуваме дека големите патриоти по чиј налог се уривал станбен комплекс или се краделе пари од превозот на ученици, мирно да спијат, додека нивните подредени одат во затвор. Затоа го повикуваме Ѓорге Иванов да ги поништи одлуките за аболиција и отвори можност против политичкиот естаблишмент да се води судска постапка како за секој друг граѓанин. Правото да носите и отповикувате одлуки се  црпат од Уставот и законите, поготово што нема одредба што тоа право го забранува. Кога „мечот” виси над Македонија, треба да се ослободите од партиските стеги и да ја повлечете аболицијата, во спротивно оганот кој го запаливте наскоро ќе не зафати сите“- велат од ДС.

Од ДС сметаат дека најавите за санкции, ако се реализираат тоа ќе биде смртоносен удар од „патриотите ” врз Македонија, затоа откажете ги изборите и повлечете ја аболицијата.

Инаку протестите ќе продолжат и ќе бидат се помасовни, граѓаните сакаат правда и мир, соопштуваат од Демократскиот сојуз.