На аеродромот во Сплит денеска попладне се случил инцидент кога авион на компанијата „Кроација ерлајнс“ излетал од пистата за време на полетување.

Станува збор за авион Ербас А220-300, со регистрациски број 9A-CAN, кој требало да го реализира редовниот меѓународен лет OU412 на релација Сплит – Франкфурт.

Според информациите што ги потврдија од Аеродромот Сплит, инцидентот се случил околу 13:30 часот. Авионот, од засега непознати причини, скршнал од пистата при полетување и завршил со едната страна на тревната површина покрај пистата. Притоа биле оштетени вертикален маркер и рабни делови на пистата, пренесуваат медиумите од соседството.

Во авионот, според аеродромот, имало 132 патници и пет членови на екипажот, кои веднаш биле безбедно евакуирани. Од „Кроација ерлајнс“, пак, соопштиле дека во авионот имало 130 патници и пет членови на екипажот, односно двајца пилоти и тројца членови на кабинскиот персонал. Компанијата нагласи дека никој не е повреден.

U zračnoj luci Split dogodio se incident u kojem je avion Croatia Airlinesa pri polijetanju izletio s piste. Zrakoplov se zaustavio na travnatoj površini pokraj uzletno-sletne staze. Zbog tog incidenta odgođeni su brojni dolasci i odlasci.https://t.co/47QVXGBndJ

— HRT Vijesti (@hrtvijesti) May 16, 2026

- Сите патници и членови на екипажот се добро и никој не е повреден. Според првите достапни информации, екипажот, постапувајќи во согласност со пропишаните безбедносни процедури, го запрел авионот - соопштија од „Кроација ерлајнс“.

Патниците го напуштиле авионот и се наоѓаат во терминалната зграда на аеродромот во Сплит, каде им се обезбедува поддршка за продолжување на патувањето.

Од Аеродромот Сплит соопштија дека соработуваат со надлежните хрватски воздухопловни и истражни институции, кои се известени за инцидентот. Техничките служби работат на отстранување на авионот од пистата.

Фото: Принтскрин/Икс