На девизните берзи вредноста на доларот во однос на кошницата валути паѓа трет ден по ред.

Индексот на доларот кој ја покажува вредноста на американскиот долар во однос на другите шест најважни светски валути се движи околу 104,10 поени, додека вчера во ова време изнесуваше 104,30 поени.

Истовремено, курсот на доларот во однос на јапонската валута се лизна од вчерашните 133,35 на 132,15 јени.

Сепак, американската валута благо зајакна во однос на европската, па цената на еврото се лизна на 1,0605 долари, додека вчера во овој момент изнесуваше 1,0610 долари.

Цените на нафтата, пак, благо пораснаа. Цената на барелот на лондонскиот пазар утрово зајакна за 0,29 отсто, на 80,20 долари, додека на американскиот пазар цената на барелот порасна за 0,17 отсто, на 76,36 долари.

Азиските берзи благо пораснаа

На повеќето азиски берзи во средата цените на акциите благо пораснаа, како и на Волстрит претходниот ден, но тргувањето е претпазливо бидејќи нема многу причини да се инвестира во поризични инвестиции.

Индексот MSCI на азиско-пацифичките акции, без јапонските акции, по два дена значителен пад беше во плус 0,4 отсто околу 07:00 часот.

Истовремено, индексот Никеи падна за 0,7 отсто на берзата во Токио, додека цените на акциите во Јужна Кореја и Шангај се лизнаа за околу 0,3 отсто.Во Хонг Конг и Австралија пораснаа меѓу 0,2 и 1,2 отсто.

Најмногу утрово порасна австралискиот берзански индекс, благодарение на растот на цените на акциите на рударските компании, по падот од претходните денови.

Од друга страна, јапонскиот Никеи индекс останува под притисок, откако челниците на централната банка на Јапонија вчера одлучија да ја олабават контролата врз приносите на обврзниците. Тоа е првиот чекор кон нормализирање на монетарната политика, по години на исклучително поддржувачка политика за поддршка на економијата.

Кинеските берзи, пак, сѐ уште се под притисок поради зголемувањето на бројот на заболени од Ковид-19, откако властите ги олеснија рестриктивните мерки.

Големи предизвици

Аналитичарите велат дека релаксирањето на тие мерки треба да поттикне раст на заспаната економија, но во следните неколку месеци ќе има големи предизвици бидејќи се очекува силен пораст на бројот на заразени со Ковид.

Инвеститорите утрово беа донекаде охрабрени од добивката од 0,5 отсто на фјучерсите на индексот S&P 500 на Волстрит

И вчера на најголемата светска берза индексите благо пораснаа, по четири дена пад. Dow Jones зајакна 0,3 отсто, додека S&P 500 за 0,1 отсто, а Nasdaq индексот 0,01 отсто.

Волстрит е под притисок од минатата среда, кога ФЕД соопшти дека каматните стапки може да се зголемат на повисоки нивоа од очекуваното и дека тие можат да останат на тие нивоа подолго од очекуваното.

Инвеститорите се надеваа дека американската централна банка, поради намалувањето на инфлаторните притисоци во САД во последните месеци, ќе ја ублажи реториката за инфлацијата и каматните стапки, но тоа не се случи.

Бидејќи ФЕД ќе продолжи да ги зголемува каматните стапки, инвеститорите стравуваат дека економијата ќе западне во рецесија, па се тргува внимателно.

Вчера берзанските индекси благо пораснаа, по четири дена нагло опаѓање, но расположението на пазарот сѐ уште не е добро бидејќи макроекономските податоци укажуваат на забавување на економскиот раст, што значи дека под притисок ќе бидат и приходите на компаниите.

Индексот S&P 500 е на пат за најголема годишна загуба од финансиската криза во 2008 година.

Извор: индекс.хр

FOTO: Freepik