Неизвесноста предизвикана од војната и иранското затворање на Ормускиот Теснец ги зголемија трошоците за живот и сериозно ги погодија буџетите на компаниите, семејствата и државите ширум светот. Но, додека многумина се доведени на работ на егзистенцијата, одредени сектори остваруваат рекордни профити благодарение на растот на цените на енергенсите и нестабилноста на пазарите. Бритиш Бродкастинг Корпорејшн (BBC) донесува преглед на најголемите добитници од конфликтот на Блискиот Исток во почетокот на 2026 година.

Нафта и гас: Енергетските гиганти со „екстремни“ резултати

Најголемиот економски ефект од војната досега е наглиот раст на цените на енергијата. Низ Ормускиот Теснец поминува околу една петтина од светската нафта и гас, но транспортот е практично запрен од крајот на февруари.

BP: Профитот на компанијата повеќе од двојно се зголеми, достигнувајќи 3,2 милијарди долари во првите три месеци од годинава.

Shell: Ја надмина добивката од 6,9 милијарди долари во првиот квартал.

TotalEnergies: Забележа скок на профитот за една третина, односно заработка од 5,4 милијарди долари.

Американските гиганти ExxonMobil и Chevron имаа благ пад поради прекините во снабдувањето, но и тие ги надминаа очекувањата на аналитичарите поради високите цени на суровата нафта.

Големите банки: Рекорди на Волстрит

Нестабилноста на пазарите е „рај“ за инвестициските банки. Трговскиот сектор на JP Morgan оствари рекордни 11,6 милијарди долари приходи во првите три месеци од 2026 година.

Заедно со останатите од „големата шестка“ (Bank of America, Morgan Stanley, Citigroup, Goldman Sachs и Wells Fargo), банките пријавија вкупен профит од дури 47,7 милијарди долари само за првиот квартал. Инвеститорите масовно ги повлекуваа парите од ризичните средства и ги вложуваа во сигурни опции, што на банките им донесе огромни провизии.

Одбранбена индустрија: Расте побарувачката за оружје

Конфликтот ги покажа недостатоците во противвоздушната одбрана и ги забрза вложувањата во ракетни системи и заштита од дронови.

BAE Systems: Очекува силен раст на продажбата поради зголемените безбедносни закани.

Lockheed Martin, Boeing и Northrop Grumman: Пријавија рекордни нарачки на крајот на првиот квартал од 2026 година.

Обновени извори на енергија: Принудна транзиција

Иако администрацијата на Доналд Трамп фаворизира поголема експлоатација на фосилни горива под слоганот „Буши, душо, буши“ (Drill, baby, drill), војната го забрза интересот за зелената енергија како клуч за стабилност.

Octopus Energy: Пријави скок на продажбата на соларни панели за 50% од крајот на февруари.

NextEra Energy и Vestas: Забележаа значителен раст на вредноста на акциите и добивката.

Електрични возила: Растот на цените на горивата го зголеми интересот за ЕV, од што најголема корист во моментов имаат кинеските производители на автомобили.