Извршниот директор на француската енергетска компанија „ТоталЕнерџис“, Патрик Пујане, предупреди дека долготраен конфликт меѓу САД и Израел од една страна и Иран од друга, може да има сериозни последици за глобалната економија.

Во изјава за кинеската државна телевизија CGTN, тој посочи дека светските пазари би можеле да издржат конфликт кој трае три до четири месеци, бидејќи првичниот шок може да се амортизира со постојните резерви.

Сепак, според него, ситуацијата станува многу посериозна поради нарушувањата во Ормускиот теснец во Персискиот Залив, каде што, како што наведе, се блокирани околу 10 милиони барели нафта дневно – количина што не може лесно да се надомести од други извори.

– Ако ова потрае подолго од шест месеци, ќе ги почувствуваме вистинските последици. Тоа ќе ги погоди сите економии во светот – изјави Пујане.

„ТоталЕнерџис“ е една од најголемите енергетски компании во светот, со повеќе од 100.000 вработени и операции во околу 120 земји. Компанијата работи во секторите на нафта и гас, течен природен гас (LNG), обновливи извори на енергија и производство на електрична енергија.

Предупредувањето доаѓа во момент кога Ормускиот теснец – една од најважните светски рути за транспорт на нафта и гас – останува сериозно нарушен. Секое подолго ограничување на пловидбата во овој регион би можело дополнително да ги зголеми цените на енергенсите и да изврши притисок врз индустријата, транспортот и домаќинствата ширум светот.

Како еден од водечките глобални играчи во секторот на течен природен гас, „ТоталЕнерџис“ е особено чувствителен на ваквите промени, што дополнително ја засилува тежината на ваквите предупредувања за можните последици од продолжената геополитичка криза.