Епилогот од претседателските избори во Франција ќе има големо влијание врз Европската унија, но и врз политиката на Европската унија кон Западен Балкан и процесот на проширување, велат дипломатите во Брисел.

Французите во вториот круг од изборите ќе избираат меѓу актуелниот претседател Емануел Макрон и кандидатот на крајната десница Марин Ле Пен.

Во случај на победа на Макрон, повеќе или помалку се очекува продолжување на политиката на Франција во ЕУ, вклучително и за процесот на проширување на блокот. Но, во случај на победа на Ле Пен, целиот европски проект може да биде доведен во ризик.

Ле Пен со години држи до анти-ЕУ ставови, па до вториот изборен круг, кој се одржува на 24 април, во Брисел владее голема нервоза.

„Ако Ле Пен победи, не само проширувањето на ЕУ, туку и внатрешните процеси на ЕУ ќе бидат загрозени“, рече европски дипломат, кој сакаше да остане анонимен, бидејќи институциите имаат традиција да не се мешаат во изборните процеси на земји членки.

Ле Пен е добро позната во институциите на ЕУ бидејќи има искуство и како пратеник во Европскиот парламент. Таа секогаш ја критикуваше политиката на отворени граници меѓу земјите на ЕУ, заедничката валута и пријателскиот однос на европскиот блок кон мигрантите. Сепак, таа сега се откажа од идејата Франција да го напушти блокот и повеќе зборува за „враќање на суверенитетот на земјите-членки“.

Но, под Макрон, Франција имаше воздржан став за процесот на проширување на ЕУ. Париз инсистираше ЕУ да ја промени методологијата за проширување, а тоа дополнително го забави процесот. 

Иако вети дека ќе работи напорно за да го унапреди проширувањето за време на нејзиното претседавање со ЕУ, Франција не направи толку многу во првите три месеци од своето претседавање со ЕУ, а тоа им се припишува на француските претседателски избори.

Но, дипломатите во Брисел се убедени дека ако победи Емануел Макрон и ако проевропските сили победат на парламентарните избори во јуни, Франција ќе биде попозитивна за процесот на проширување и ќе продолжи со својата посветеност на мирот и стабилноста на Западен Балкан.

Франција, која претходно оваа година го презеде шестмесечното претседавање со ЕУ, планира да одржи специјална конференција за Западен Балкан.