Барањата на пазарот на трудот се менуваат побрзо од кога било, а вештачката интелигенција (AI) станува новата основна писменост за идните генерации. Ова го покажува извештајот „remAIn relevant: Вештини за работните места на иднината“, кој анализира какви знаења и способности ќе бидат најбарани во наредните години.

Резултатите од истражувањето покажуваат дека компаниите сè повеќе бараат комбинација од технички и таканаречени „меки“ вештини, а формалното образование често не е доволно за да ги подготви младите за реалните потреби на современиот пазар на труд.

Вештачката интелигенција станува основна вештина

Клучните наоди од извештајот покажуваат дека:

90,9% од компаниите сметаат дека користењето на вештачка интелигенција ќе биде клучна техничка вештина во следните пет години;

81,8% истакнуваат дека флексибилноста, адаптибилноста и континуираното учење се најважните нетехнички вештини;

54,5% од компаниите како најголем проблем при вработување го наведуваат недостатокот на искуство со специфични технологии;

87,9% очекуваат раст на побарувачката за експерти за вештачка интелигенција и машинско учење;

72,7% истакнуваат потреба од стручњаци за анализа и обработка на податоци.

Истовремено, повеќе од половина од компаниите оценуваат дека аналитичкото и креативното размислување кај кандидатите е на просечно ниво, што укажува дека младите често не се доволно подготвени за работа во динамична деловна средина.

Дипломата е само почеток

Според експертите, користењето на вештачка интелигенција веќе не е специјализирана вештина резервирана само за ИТ секторот, туку станува основна компетенција – слично како познавањето на странски јазик или користењето компјутер пред две децении.

Воедно, извештајот покажува дека дипломата не е крајна точка на образованието, туку само почетна линија, бидејќи компаниите бараат луѓе кои постојано учат, се адаптираат и се подготвени за промени.

Потребна е посилна врска меѓу образованието и индустријата

Експертите нагласуваат дека е неопходно поголемо поврзување на универзитетите со приватниот сектор, преку практични проекти, менторски програми и неформални образовни иницијативи.

Посебен фокус се става на области како што се:

вештачка интелигенција

анализа на податоци

сајбер безбедност

аналитичко и креативно размислување.

Вештините на иднината не се само за техничките факултети

Извештајот истакнува дека овие компетенции не се важни само за студентите од техничките факултети. Тие се подеднакво релевантни и за студентите од општествените и хуманистичките науки, кои преку дополнителни програми можат да се вклучат во дигиталната економија.

Покрај тоа, ваквиот пристап може да помогне и во намалување на родовиот јаз во технолошкиот сектор, каде жените сè уште се недоволно застапени.

Според експертите, пазарот на трудот се менува побрзо отколку што образовните системи можат да го следат, па затоа континуираното учење и прилагодување ќе бидат клучни за успешна кариера во иднина.